Framkvæmdir við Álftanesveg
óhjákvæmilegt að umferð tefjist tímabundið
Nú standa yfir framkvæmdir við Álftanesveg þar sem verið er að endurnýja slitlag á 600 m kafla frá Hringtorgi við Bessastaðaveg að Garðavegi. Ekki er hægt að vinna þetta örðuvísi en á annarri akreininni í einu og umferðin í báðar áttir fer þá um hina akreinina. Umferðinni er stýrt með ljósum og á álagstímum er henni handstýrt.
Verkáætlun verktaka á þessum 600 m vegkafla gengur út á að verktaki verður að vinna með umferð á sér þannig að hann tekur frá vegmiðju hálfan veginn í einu við að styrkja burðarlag, breikka veginn og malbika yfir aftur. Síðan tekur hann kaflann frá vegmiðju að ljósastaurum með sama hætti og umferðin færist þá yfir á nýja hlutann á meðan. Gert er ráð fyrir að verkferlið taki 10 daga og standi út næstu viku. Einnig er verktaki að endurnýja göngustíginn norðan megin og verður hann aðskilinn með vegriði.
Óþarfa tafir urðu á svæðinu á umferð þar sem ljósunum var ekki handstýrt á álagstímum á morgnanna og síðdegis en úr því var fljótlega bætt. Nú er þá tekið mið af því að umferðin er mun meiri frá Álftanesi á morgnana og til baka síðdegis, sem vonandi styttir biðtíma vegfarenda og einnig hafa tímasetningar á umferðarljósunum þess utan verið bættar. Vegagerðin biðst afsökunar á þeim óþarfa töfum sem íbúar hafa orðið fyrir. En á sama tíma er óskað eftir því að sýnd sé tillitssemi og merkingar virtar, ekki er mögulegt að fara aðrar leiðir en þessa. Óþægilegt er að vinna með umferðina á veginum en stundum eru engir aðrir kostir í stöðunni. Því miður. En á móti þá verður vegurinn betri loks þegar framkvæmdum lýkur.
Þetta er einn áfangi verksins og að honum loknum verður tekinn kaflinn frá Garðavegi og austur en þá verður mögulegt að umferðin fari um hjáleið, um Garðaholt, sem ætti að auðvelda málið fyrir alla.
Nýr fullbúinn Álftanesvegur á að vera tilbúinn 1. september 2015.
