Meiri umferð á höfuðborgarsvæðinu í júní
gæti bent til fleiri styttri ferða á kostnað þeirra lengri
Umferðin um þrjú mælisnið Vegagerðarinnar á höfuðborgarsvæðinu jókst um 4,3 pósent í júní sem er langamesta aukningin sem sést hefur í einum mánuði á þessu ári. Frá áramótum hefur aksturinn á höfuðborgarsvæðinu aukist um tæpt prósent.
Vegagerðin reiknar nú með að umferðin á svæðinu aukist um ríflega eitt prósent árið 2012, samkvæmt spálíkani. Aukin umferð í júní bendir til þess að fjölgun hafi orðið á styttri ferðum höfuðborgabúa út á land, dagsferða eða tveggja daga ferða á kostnaði lengri ferða.
Milli mánaða 2011 og 2012
Þrjú mælisnið innan höfuðborgarsvæðis gefa vísbendingar um að mun meiri umferð hafi verið á höfuðborgarsvæðinu í júní í ár miðað við síðasta ár, en akstur jókst um 4,3% á milli júní mánaða sem er langmesta aukning milli einstakra mánaða það sem af er þessu ári.
Umferðin jókst mest um Vesturlandsvegi eða 6,5% en minnst á Hafnarfjarðarvegi eða 3,3%.
Þetta kann að vera enn ein vísbending þess að skreppitúrum fjölgi út frá höfuðborgarsvæðinu.
Tilgátan um aukna skreppitúra gengur m.a. út á það að íbúar höfuðborgarsvæðis séu í minna mæli í lengri fríum út á landi en áður og þess í stað farnir að skreppa í styttri dagstúra út úr borginni í meiri mæli en áður, eins og vísbendingar frá teljurum út á landi benda til. Sé það rétt þá koma höfuðborgarbúar heim sama dag eða degi seinna e.t.v. og mælast þá í umferðartalningum innan og rétt utan svæðisins. Það kann að skýra að hluta til aukna umferð yfir sumarmánuði innan höfuðborgarsvæðis og aukna umferð á föstudögum og laugardögum um Hvalfjörð og Hellisheiði t.d. En þetta skýrist betur að loknu þessu sumri.
Þessu til viðbótar má benda á að umferðin í júlí er mjög lítil á höfuðborgarsvæðinu, þegar búast má við að höfuðborgarbúar flykkist út á land í lengri ferðir, sjá meðfylgjandi línurit, en þá er umferðin lang mest í sama mánuði úti á landi.
Frá áramótum milli ára 2011 og 2012
Frá áramótum hefur akstur í þremur mælisniðum innan höfuðborgarsvæðisins aukist um 0,9%.
Horfur út árið 2012
Áfram er búist við mikilli aukningu á akstri í næsta mánuði eða júlí en samdrætti í ágúst og september samanber meðfylgjandi mynd. Nú stefnir í að rúmlega 1% aukning verði á akstri innan höfuðborgarsvæðisins, gangi spár eftir.