Er umferðin á Hringvegi að rétta úr kútnum?
nánast enginn samdráttur í júní
Samdráttur í umferð, á 16 mælipunktum á Hringvegi, varð aðeins 0,4% minni í júní 2011 m.v. sama mánuð árið 2010. Þetta er lang minnsti samdráttur sem mælst hefur á þessu ári, milli einstakra mánaða. Það má segja að þessi óverulegi samdráttur nú, komi á óvart, sé horft til þess mikla samdráttar sem orðið hefur undanfarna mánuði og vísbendingar í helgarumferð á 6 mælistöðum á Hringvegi í kringum höfuðborgarsvæðið í júní gáfu til kynna, samanber eldri fréttir af helgarumferð.
Mestu munar um að umferðin á mælpunktum á Suðurlandi jókst nú, milli mánaða, í fyrsta sinn á þessu ári eða um 4,5% sem jafnframt er mesta aukning á einstökum landssvæðum, sbr. meðfylgjandi töflu nr. 3.
Á Hringvegi um Höfuðborgarsvæðið varð 0,3% aukning.
Mest dróst umferðin saman í mælipunktum á Norðurlandi eða 5,4%.
Mest eykst umferðin í mælipunkti vestan Hvolsvallar (umferð frá Landeyjarhöfn) en dregst mest saman í mælipunkti á Mývatnsheiði (kalt veður í júní).
Þegar árið er hálfnað, hefur umferðin í 16 mælipunktum á Hringvegi, dregist saman um 7%, miðað við árið 2010. Mestur hefur samdrátturinn orðið á Suðurlandi eða um 12,5% en minnstur um höfuðborgarsvæðið eða um 5%.
Horfur út árið:
Það sem af er ári hefur samdráttur í akstri á Hringvegi (16. lykilteljarar) orðið talsvert meiri en í þremur mælisniðum innan Höfuðborgarsvæðis, sbr. eldri fréttir af umferð á höfuðborgarsvæðinu. Óhjákvæmilegt er því að taka tillit til þeirrar þróunar nú, þótt 16 lykilteljarar hafi hingað til gefið góða vísbendingu um þróun aksturs á landinu öllu.
Að teknu tilliti til þessa má nú búast við um 6 prósenta samdrætti í akstri á landinu öllu árið 2011, þegar það er hálfnað. (Ath. spá).
Nú fer í hönd umferðarmesti mánuður ársins. Afar fróðlegt verður að sjá hvaða umferðartölur koma frá þeim mánuði.
Hafa ber í huga að meiri umferð í júlí nú í ár, en áætlanir gera ráð fyrir, getur hæglega kollvarpað þessum horfum/spá út árið. Því rétt að hafa allan fyrirvara á, að svo komnu. En að loknum júlí, hefur reynslan hingað til sýnt að horfur út árið hafa reynst nokkuð áræðanlegar.