Líkan af Hvítárbrú
afhjúpað í tilefni af því að 100 ár eru liðin frá komu Vegagerðarinnar til Borgarness
Líkan af Hvítárbrú var afhjúpað í Safnahúsi Borgarfjarðar í Borgarnesi nú fyrir jólin í tilefni þess að í ár eru 100 ár frá því að telja má að Vegagerðin opnaði starfsaðstöðu í Borgarnesi. Það var Guðjón Bachmann sem hóf störf í Borgarnesi árið 1910, brúarsmiður og verkstjóri.
Líkanið smíðaði Erling M. Andersen í hlutföllunum 1:42. Hreinn Haraldsson vegamálastjóri sagði við þetta tækifæri að þótt vitað væri hvenær starfsemi hefði hafist í Borgarnesi væri ekki vitað hvenær formlega vegagerð forvera Vegagerðarinanr hefði hafist á Íslandi en það hefði líklega verið litlu fyrr.
Magnús V. Jóhannsson svæðistjóri norðvestursvæðis nefndi auk Guðjóns verkstjórann Ara Guðmundsson en afkomendur þeirra beggja voru viðstaddir athöfnina í Safnahúsinu. Til að byrja með verður líkanið til sýnis í Safnahúsinu. Magnús sagði meðal annars þetta í ávarpi sínu:
"Samkvæmt mínum bestu heimildum þá var tekin um það ákvörðun af Jóni Þorlákssyni landsverkfræðingi árið 1910 að í Borgarnesi skyldi verða miðstöð allra vegabóta í héraðinu og var Guðjóni nokkrum Bachmann falin umsjón með vegagerð á svæðinu. Það sama ár flutti hann í Borgarnes sem fastráðinn starfsmaður landsverkfræðings með aðsetur þar.
Embætti landsverkfræðings er jú forveri Vegagerðarinnar. Embættið var stofnað nokkru fyrir aldamótin 1900. Í upphafi árs 1918 var embætti landsverkfræðings skipt í tvo hluta, embætti vegamálastjóra (Geir G. Zoega) og vitamálastjóra (Thorvald Krabbe) en frá þeim þróuðust stofnanirnar Vegagerð ríkisins, síðar Vegagerðin og Vita- og hafnamálaskrifstofan. Sameining aftur.
Það má því segja að árið 1910 marki upphaf starfsemi Vegagerðarinnar í Borgarnesi og hefur hún því staðið sleitulaust þar allar götur síðan, eða í 100 ár. Við Vegagerðarmenn teljum þetta merk tímamót og því tilefni til að halda lítillega upp á þau."
Sjá frétt safnsins og frétt í Skessuhorni.
Jakob Hálfdanarson minjavörður Vegagerðarinnar tók myndirnar hér fyrir neðan:
Afkomendur Guðjóns og Ara. Frá vinstri Ómar Arason, Sigvaldi Arason, Hjördís Karlsdóttir (barnabarn Guðjóns), Unnsteinn Arason, Hólmsteinn Arason og Guðmundur Arason.