Heimamenn fagna Bolungarvíkurgöngum
Ráðherrar og vegamálastjóri opnuðu göngin
Heimamenn beggja vegna Bolungarvíkurganga fögnuðu ákaft við opnun ganganna laugardaginn 25. september ásamt forseta Íslands, Ólafi Ragnari Grímssyni. Ögmundur Jónasson samgönguráðherra klippti á borðanna ástamt vegamálastjóra Hreini Haraldssyni og þótti Ögmundi rétt að fá einnig aðstoð Kristjáns L. Möllers forvera síns í starfi.
Opnunin markar þau tímamót að verktakinn Ósafl ehf. afhendir Vegagerðinni mannvirkið sem síðan opnar mannvirkið til notkunar fyrir almennig. Um leið og Ögmundur hafi klippt á borðann fögnuðu gestir ákaft og ljóst að það eru ekki margir íbúar á svæðinu sem munu sjá eftir Óshlíðarvegi sem gjarnan hefur verið kallaður hættulegasti vegarkafli á Íslandi.
Eftir að klippt var á borðann ók ráðherra fyrstur í gegn og fylgi forsetinn á hæla hans. Hnífsdalsmegin tókust síðan bæjarstjórar Bolungarvíkur og Ísafjarðarbæjar í hendur og opnuðu með aðstoð ráðherra fyrir umferð í þá áttina einnig. Flestir sem vettlingi gátu valdið óku síðan í gegnum göngin.