Fréttir
Metaregn í umferð um Hringveginn
Nýtt met var slegið í aukningu umferðar í nýliðnum júlí borinn saman við sama mánuð á síðasta ári en aukningin var 8,9%. Aldrei hefur umferð aukist hlutallslega svo mikið á milli júlí mánaða og aldrei hafa fleiri bílar ekið um Hringveginn í nokkrum mánuði en í nýliðnum júlí. Samtals óku daglega um 92 þúsund ökutæki yfir 16 lykil teljarasnið Vegagerðarinnar, á Hringvegi. Nú stefnir umferðin, á Hringvegi, árið 2015 fari vel upp fyrir fyrra met frá árinu 2007.
Milli mánaða 2014 og 2015
Þrátt fyrir lélega tíð á stórum hluta landsins í júlí varð gríðarleg aukning í umferð nýliðnum júlí m.v. sama mánuð á síðasta ári, á Hringvegi. Þessi mikla aukning er að stærstum hluta borin uppi af mikilli aukningu um Suðurlandi, við höfuðborgarsvæðið og á Vesturlandi. En á þessum svæðum jókst umferðin frá 10,2% - 12,4%. Þar sem umferðin er að jafnaði mest um þessi svæði vegur hvert prósentustig á þeim mjög þungt í samanlagðri aukningu lykilteljara.Umferð um Norður- og Austurlandi í júlí jókst lítið eða um 0,2% og 1,7%. Þessa litlu aukningu má sennilega rekja til lélegs tíðarfars í nýliðnum júlí á þessum svæðum.Þegar öll þessi aukning er lögð saman og vegin verður niðurstaðan 8,9% aukning í júlí m.v. sama mánuð á síðasta ári, sem er nýtt met í prósentum talið milli júlí mánaða. Í bílum talið hefur umferðin aldrei verið meiri í júlí mánuði og þ.a.l. er þetta einnig met í einstökum mánuði. Að meðaltali fóru um 92 þús. ökutæki um teljarasniðin 16 hvern einasta dag í júlí. Fyrra metið var frá árinu 2009 en þá fóru tæp 85 þús. ökutæki daglega um teljarasniðin.
Frá áramótum milli áranna 2014 og 2015
Þrátt fyrir mikla aukningu í umferð, á milli júlí mánaða, hefur umferðin frá áramótum ,,aðeins" aukist um 3,5% miðað við sama tímabil á síðasta ári. Þessi aukning verður þó að teljast talsverð. Mest hefur umferðin aukist um Austurland eða 8,0% en minnst um teljarasnið við höfuðborgarsvæðið eða 2,9%
Umferð eftir vikudögum milli áranna 2014 og 2015
Umferð eftir vikudögum milli áranna 2014 og 2015
Líkt og fyrir síðasta tímabil hefur umferðin aukist alla vikudaga fyrir utan sunnudaga. Frá áramótum hefur umferðin aukist hlutfallslega mest á þriðjudögum eða 5,8% en dregist saman um 0,5% á sunnudögum.Lang mest er keyrt á föstudögum en minnst á þriðjudögum.
Horfur út árið 2015
Núna bendir allt til þess að umferð geti aukist um 3 - 3,5% miðað við árið 2014. Verði það raunin teldist það hófleg aukning yfir skemmra tímabil en í meira lagi yfir lengra tímabil. Gangi spáin eftir yrði nýtt met sett í umferðinni, á ársgrundvelli, um Hringveginn en núverandi met er frá árinu 2007. Umferðin, um teljarasniðin 16, hefur aukist að jafnaði um 1,3% frá árinu 2005 en standist spár um aukning nú í ár myndi það fela í sér að umferðin hafi aukist um 4% á ári frá árinu 2012. (Ath. 2012 var minnst ekið á Hringvegi eftir hrun).
Ath. allar umferðartölur, fyrir árið 2015, eru eingöngu grófrýndar og gætu því tekið breytingum við síðari yfirferð.