Sama umferð í apríl á Hringveginum og í fyrra
Samdráttur fyrstu fjóra mánuðina
Milli mánaða 2014 og 2015
Engin heildarbreyting varð í umferð í nýliðnum apríl borið saman við sama mánuð síðasta árs. En þegar taflan hér fyrir neðan er skoðuð sést að umferðin dróst klárlega saman í öllum svæðum nema í grennd við höfuðborgarsvæðið, þar sem hún jókst um 1,6%. Þessi auking við höfuðborgarsvæðið dugði til þess að vega upp á móti samdrætti annara svæða.
Mest dróst umferðin saman um Suður- og Austurland eða um 3,4% á báðum svæðum.
Frá áramótum 2014 og 2015
Umferð hefur nú dregist saman um 0,1% frá áramótum á 16 völdum stöðum á Hringvegi en mestu munar þar um að umferð hefur dregist saman um 2,3% á Suðurlandi og 0,3% á og við höfuðborgarsvæðið. Umferð um Austurland hefur aukist mest eða um 9% en lítið umferðarmagn er um mælipunktinn á Austurlandi í samanburði við önnur svæði þ.a.l. hefur mikil auking eða, eftir atvikum, samdráttur lítil áhrif á heildarniðurstöðu þessarar samantektar.
Miðað við 4 fyrstu mánuði ársins lítur út fyrir að umferðin geti dregist saman um 1%. Þessi niðurstaða er nokkuð önnur en það sem á sér stað á höfuðborgarsvæðinu, sbr. fyrri fréttir þar um. Gangi spá um samdrátt ekki eftir er það vísbending um að fjórir fyrstu mánuðir ársins hafi verið nokkuð óhefðbundnir miðað við undanfarin ár.
Hafa skal í huga að umferðarmestu mánuðir ársins eru framundan og munu þeir ráða mestu um lokaniðurstöðu ársins. Það er því enn óvarlegt að fullyrða nokkuð um hvort samdráttur eða aukning verði í umferðinni um Hringveginn nú í ár.
Vikudagsumferðin það sem af er ári 2014 og 2015
Það vekur athygli að umferð eftir vikudögum virðist vera að aukast á virkum dögum en dragast saman um helgar. Hlutfallslega hefur umferð, það sem af er ári, aukist mest á miðvikudögum eða um 2,4%. Umferð hefur aftur á móti dregist gríðarlega saman á sunnudögum, það sem af er ári, eða um rúmlega 10%. Þessi mikli samdráttur í umferð um helgar veldur því að umferðin hefur dregist aðeins saman þrátt fyrir aukningu í umferð á öðrum dögum.
Það mætti ef til vill draga þá ályktun að atvinnutengd umferð sé að aukast á sama tíma sem frítímaumferð dregst saman. Hvers vegna frítímaumferð dregst saman gæti verið tengt óvenju lélegu tíðarfari, sérstaklega sunnan og suðvestanlands.