Nærri 40% aukning í umferð á Hringvegi, en minni umferð samt en árið 2019
Umferðin frá áramótum hefur aukist um nærri 14 prósent
Umferðin á Hringvegi í nýliðnum apríl mánuði jókst um 37,2 prósent miðað við sama mánuð fyrir ári. Frá áramótum hefur umferðin aukist um 13,6 prósent frá því í fyrra en dregist saman um tæp sjö prósent frá því sem hún var árið 2019.
Milli mánaða 2020 og 2021
Umferðin, yfir 16 lykilteljara Vegagerðarinnar á Hringvegi,
jókst um 37,2% í apríl miðað við sama mánuð á síðasta ári. Þetta er eðlileg
aukning í ljósi ástandsins vegna Covid-faraldursins á sama tíma í fyrra og nú.
Mest jókst umferðin um Norðurland eða um heil 74,5% en minnst um höfuðborgarsvæðið eða um 26,1%.
Aukning varð á öllum talningarstöðum en mesta við Gljúfurá, sunnan Blönduós, eða um 100,4% og minnst jókst umferðin við Úlfarsfell eða um 22,0%.
Það sem af er ári
Nú hefur umferðin aukist um 13,6% frá áramótum og þætti það
mjög mikið ef síðasta ár hefði verið venjulegt, en þrátt fyrir þessa miklu
aukningu er umferðin á Hringveginum tæplega 6% undir því sem hún var, árið
2019.
Umferðin eftir vikudögum
Umferð hefur aukist í öllum vikudögum frá áramótum. Mest
hefur umferð aukist á sunnudögum eða um tæp 27% en athygli vekur að umferð hefur
,,aðeins“ aukist um tæp 7% á miðvikudögum. Sé umferðin hins vegar borin saman
við árið 2019 hefur hún dregist saman í öllum vikudögum, utan þriðjudaga,
mest á laugardögum eða um tæp 10% en 0,4% aukning hefur verið á þriðjudögum.
Horfur út árið 2021
Miðað við fjóra fyrstu mánuði ársins gæti umferðin aukist um 7%
á Hringvegi nú í ár miðað við síðasta ár. Gangi sú spá eftir og umferðin borin
saman við árið 2019 þá myndi hún vera 7% minni. Svo enn eru ekki teikn á lofti um
að umferðin nái fyrri ,,styrk“ nú í ár, sem aftur leiðir hugann að
tengslum hennar við hagvöxtinn og þá má draga þá ályktun að umsvif
þjóðfélagsins munu ekki aukast það mikið í ár að þau verði jafnmikil og þau voru árið 2019.
