Landshnitakerfi Íslands endurmælt í sumar
vegamálastjóri og forstjóri Landmælinga ræstu verkefnið
Það er mikilvægt að mæla rétt. Til þess að það sé hægt þurfa föstu punktarnir sem miðað er við að vera réttir og þar sem Ísland er á stöðugri hreyfingu þarf að endurmæla grunnstöðvanetið reglulega. Slík endurmæling verður gerð í sumar. Forstjóri Landmælinga Íslands og vegamálastjóri komu verkefninu í gang á Valhúsahæðinni á Seltjarnarnesi 31. maí.
Endurmælingin á grunnstöðvaneti Íslands er nauðsynleg til að viðhalda nákvæmni í landshnitakerfinu sem aflagast vegna mikilla jarðskorpuhreyfinga hér á landi. Landshnitakerfið og viðmiðun þess er grundvöllur annarra landmælinga hér á Íslandi og þar með undirstaða stafrænnar kortagerðar, landfræðilegra upplýsingakerfa, vöktunar og verklegra framkvæmda.
Vegagerðin styður við þetta verkefni þar sem það er mjög mikilvægt í allri vegagerð þar sem gps-tæknin er nýtt til hins ýtrasta, til að vegurinn hafni á kórréttum stað þurfa föstu punktarnir að vera þekktir og réttir. Og gildir þá að mæla rétt og þá ekki í þeim skilningi sem einokunarkaupmaður Húsvíkinga átti við þegar hann kallaði til Skúla Magnússonar: "Mældu rétt, strákur".
Grunnstöðvanetið hefur verið mælt tvisvar áður með GPS-tækni, fyrst árið 1993 og svo aftur árið 2004. Að þessu sinni er gert ráð fyrir að mæla 123 fasta punkta í kerfinu auk þess að nota síritandi GPS-mælingar frá um 100 föstum jarðstöðvum Landmælinga Íslands og samstarfsaðila. Að mælingum loknum tekur við eftirvinnsla og útreikningar með það lokamarkmið að skilgreina og gefa út nýja viðmiðun fyrir Ísland, ISN2016. Mjög mikilvægt er að sú viðmiðun komist sem fyrst í notkun hjá framkvæmdaaðilum því gera má ráð fyrir að bjögun í núgildandi viðmiðun (ISN2004) sé 20-25 cm og bjögun ISN93 sé 40-50 cm.
Til verkefnisins fékkst sérstök fjárveiting úr ríkissjóði en auk Vegagerðarinnar styðja einnig Landsvirkjun og Landhelgisgæslan við verkefnið. Fyrir þessar stofnanir er augljós ávinningur af því að viðhalda nákvæmni hnitakerfisins en hið sama gildir um ýmsar aðrar stofnanir, sveitarfélög og einkafyrirtæki sem tengja landmælingar við hnitakerfið t.d. við kortagerð, skipulagsmál og verklegar framkvæmdir.
Á meðfylgjandi myndum má sjá vegamálastjóra, Hrein Haraldsson, og Magnús Guðmundsson, forstjóra Landmælinga Íslands, ýta þessu mikilvæga landmælingaverkefni úr vör á Valhúsahæð á Seltjarnarnesi þann 31. maí sl. en sá mælipunktur hefur verið einn af grunnpunktum í landmælingum á Íslandi frá árinu 1904.
