Hált malbik – frekari aðgerðir
Gullinbrú malbikuð á fimmtudag
Gullinbrú verður malbikuð að nýju síðdegis fimmtudaginn 2. júlí en vegkaflinn var fræstur mánudaginn 29. júní þar sem nýlögn á veginum stóðst ekki staðla um viðnám.
Hálkuverjandi aðgerðir hafa verið gerðar á Vesturlandsvegi um Kjalarnes. Malbikið var hitað upp og í það dreift salla. Mælingar sýna að viðnámið er viðunandi. Vegurinn verður undir sérstöku eftirliti fram á mánudag þegar til stendur að malbika að nýju.
Aðrir kaflar þar sem sýnt þykir að viðnámi er ábótavant verða fræstir á morgun fimmtudag og malbikaðir við fyrsta tækifæri. Þetta eru vegkaflar við Sæbraut nærri Laugarásbíói, Bústaðaveg við Veðurstofu Íslands og Reykjanesbraut við Vífilsstaði.