Flykktust út á land í júlí
samdráttur í júlí á höfuðborgarsvæðinu en aukning á Hringvegi
Umferðin á höfuðborgarsvæðinu í júlí dróst saman rúm þrjú prósent á meðan að umferðin á Hringveginum jókst um sex prósent og hefur aldrei verið meiri í júlí. Þetta bendir til þess að íbúar höfuðborgarsvæðisins hafi í miklum mæli sótt út á land í júlí, hugsanlega til að elta sólina. Umferðin í júlí á höfuðborgarsvæðinu hefur ekki verið minni í fimm ár.
Milli mánaða
Umferðin á höfuðborgarsvæðinu var með minnsta móti í nýliðnum júlí
en hún reyndist 3,1% minni en í sama mánuði á síðasta ári. Leita þarf 5 ár
aftur tímann eða til ársins 2016 til að finna minni umferð í júlímánuði.
Umferð dróst saman í öllum mælisniðum og mest um Vesturlandsveg ofan Ártúnsbrekku eða um 7,3% en minnst um Reykjanesbraut við Dalveg í Kópavogi eða um 0,6%.
Þetta er þveröfug þróun en átti sér stað á sama tíma úti á Hringveginum svo nærtækast er að draga þá ályktun að óvenju stór hluti höfuðborgarbúa hafi verið úti á landi í júlí.
Frá áramótum
Nú hefur uppsöfnuð umferð frá áramótum til júlí aukist um
6,4% miðað við sama tímabil á síðasta ári. Þrátt fyrir þessa miklu aukningu er
heildarumferðin samt rétt rúmlega 3% minni en hún var á sama tíma árið 2019.
Umferð eftir vikudögum
Ef horft er á nýliðinn júlímánuð og hann borinn saman við
sama mánuð á síðasta ári þá dróst umferð saman í öllum vikudögum, nema á
föstudögum en þar varð um 1,4% aukning, en mest dróst umferð saman á miðvikudögum
eða um 8,3%.
Mest var ekið á föstudögum en minnst á sunnudögum.
Horfur út árið 2021
Nú stefnir í að umferð um höfuðborgarsvæðið gæti aukist um 8,5% miðað við árið 2020 en þrátt fyrir þessa aukningu yrði hún samt um 2,5% minni en hún var
árið 2019.