Enn eru slegin met í umferðinni
tíðin í febrúar var góð sem er hluti skýringarinnar
Umferðin um 16 lykilteljara Vegagerðarinnar á Hringveginum jókst um meira en 15 prósent í febrúar sem er gríðarlega mikil aukning, en fyrir ári var líka slegið met í aukningu í umferðinni en nú er aukningin enn meiri. Hluti af skýringunni er að tíðin í febrúar var góð sem skilar sér í aukinni umferð. Nú hefur umferðin frá áramótum aukist um 14 prósent sem er líka met.Milli mánaða 2016 og 2017
Umferðin jókst um 15,3% milli febrúarmánaða, um 16
lykilteljara Vegagerðarinnar á Hringvegi. Þetta er mesta aukning milli
febrúarmánaða frá því að þessi samantekt hófst árið 2005. Gamla metið frá
síðasta ári var slegið með 0,7 prósentustigum. Þessi mikla aukning kemur
Vegagerðinni ekki á óvart þar sem óvenju góð tíð var á landinu í nýliðnum
febrúar.
Mest jókst umferðin um Austurland eða um 44%, en næst mest um Suðurland eða um 28%. Hafa ber í huga að umferð um Austurland er jafnframt sú minnsta í þessum samanburði. Minnst jókst umferðin um og við höfuðborgarsvæðið eða um 11%, sem er mjög mikil aukning á þessu svæði, þar sem umferðin er mest.
Frá áramótum milli áranna 2016 og 2017
Umferðin hefur nú aukist um rétt rúmlega 14%, frá áramótum miðað við sama tímabil á síðasta ári. Þetta er met aukning miðað við árstíma, frá upphafi þessarar samantektar. Gamla metið frá síðasta ári var slegið með 0,5 prósentustigum.
Mest hefur umferðin vaxið á Austurlandi eða um 35% en minnst um höfuðborgarsvæðið eða um 11%, sem er gríðar mikið á þessu svæði.
Umferðin eftir vikudögum milli áranna 2016 og 2017
Það sem af er ári hefur umferðin aukist hlutfallslega mest á
fimmtudögum, miðað við sama tímabil á síðasta ári, eða um rúmlega 21%. Minnst hefur
aukningin mælst á sunnudögum eða um 8%.
Mest hefur verið ekið á föstudögum en minnst á miðvikudögum.