Fréttir
  • Morgunfundur Vegagerðarinnar um öryggi starfsfólks við vegavinnu var haldinn 7. maí 2024.
  • Þröstur Reynisson, verkstjóri á þjónustustöð Vegagerðarinnar í Borgarnesi.
  • Ágúst Jakob Ólafsson, yfirverkstjóri hjá ÍAV.
  • Einar Hrafn Hjálmarsson, verkefnastjóri hjá ÍAV.
  • GunnaGunnar Geir Guðmundsson, deildarstjóri öryggis- og fræðsludeildar Samgöngustofu.
  • Vel var mætt á fundinn.
  • G. Pétur Matthíasson var fundarstjóri.

Á 174 km hraða í gegnum vinnusvæði

Morgunfundur um öryggi starfsfólks við vegavinnu

8.5.2024

Vel var mætt á morgunfund Vegagerðarinnar um öryggi starfsfólks við vegavinnu sem haldinn var þriðjudaginn 7. maí. Meðal fyrirlesara var Ágúst Jakob Ólafsson, yfirverkstjóri ÍAV, sem greindi frá því að bílar hafi mælst aka á yfir 170 kílómetra hraða í gegnum vinnusvæði þar sem hámarkshraði er merktur 50 km/klst.

Sævar Helgi Lárusson, öryggisstjóri Vegagerðarinnar, hélt erindið „Manstu ekki eftir mér“ þar sem hann fór yfir helstu reglur sem gilda um akstur í gegnum vinnusvæði. Hann kynnti vitundarátakið; Aktu varlega! – mamma og pabbi vinna hér, sem verður í gangi í sumar. Vegagerðin og verktakar munu taka höndum saman og setja upp sérstök skilti við framkvæmdasvæði í sumar, sem minna fólk á að aka varlega, enda séu mæður, feður, ömmur, afar, frændur og frænkur að störfum. Þannig verður reynt að auka vitund vegfarenda um öryggi á vinnusvæðum á og við vegi landsins.

Manstu ekki eftir mér? Sævar Helgi Bragason

Þröstur Reynisson, verkstjóri á þjónustustöð Vegagerðarinnar í Borgarnesi, ræddi sína upplifun af því að starfa úti á vegi, sér í lagi í holuviðgerðum. Hann var ómyrkur í máli og sagði hraðakstur allt of algengan og þótti lítil virðing borin fyrir þeim sem starfa á vegum úti. Hans upplifun er að atvinnubílstjórar sýni minnstu tillitssemina en stjórnendur þjónustustöðvarinnar séu duglegir að hringja í fyrirtækin sem oft taki vel á málunum í kjölfarið.

Óöryggi á vegum úti - Þröstur Reynisson

Ágúst Jakob Ólafsson, yfirverkstjóri hjá ÍAV, sagði frá reynslu fyrirtækisins við framkvæmdir á umferðarþungum vegum á borð við Suðurlandsveg milli Hveragerðis og Selfoss og nú Reykjanesbraut. Verktakinn hefur sett upp tvær stuttar hjáleiðir við framkvæmdasvæðið og sett þar upp merkingar og skilti sem mæla hraða ökumanna. Hraðinn á öllu framkvæmdasvæðinu er 70 km/klst en á hjáleiðunum 50 km/klst. Allt of algengt sé að menn aki of hratt gegnum framkvæmdasvæðið, svo og hjáleiðirnar. Sá sem ók hraðast mældist á 174 km hraða þegar hann var að koma út úr annarri hjáleiðinni.

Ágúst tók undir orð Þrastar um að atvinnubílstjórar séu ótillitssamari en aðrir þegar ekið er framhjá framkvæmdasvæði.

Einar Hrafn Hjálmarsson, verkefnastjóri hjá ÍAV, fjallaði stuttlega um hönnun hjáleiða og hvað mætti betur fara. Hann taldi einu leiðina til að fá ökumenn til að hægja ferðina vera þá að setja upp hraðamyndavélar á framkvæmdasvæðum og sekta ökumenn sem aki of hratt. Líklega þurfi þó að koma til reglugerðarbreyting til þess.

 
Íslenskir Aðalverktakar

Gunnar Geir Guðmundsson, deildarstjóri öryggis- og fræðsludeildar Samgöngustofu, var síðastur á mælendaskrá. Hann fagnaði umræðunni og kynnti nýtt fræðslumyndband um akstur gegnum vinnusvæði sem Samgöngustofa hefur látið vinna.

Akstur í gegnum vinnusvæði - fræðslumynd - Gunnar Geir Guðmundsson