Sinna viðhaldi vita í misjöfnum aðstæðum
Skemmtilegt myndband af störfum vitadeildar Vegagerðarinnar
Guðmundur hefur leikið sér að myndbandsupptökum í nokkurn tíma og fjárfesti í GoPro myndavél á síðasta ári. „Ég setti bara myndavélina á hausinn og lagði svo í hann. Ég á því töluvert magn af efni en þetta myndband er brot af því besta sem ég tók upp á ferðum okkar í fyrra,“ segir Guðmundur en tekur fram að hann hafi einungis myndað í góðu veðri. „Veðrið er nú sjaldan svona gott.“Guðmundur hafði hugsað sér að taka upp efnið til að sýna það rafvirkja sem til stóð að ráða, svo hann gæti gert sér í hugarlund út á hvað starfið gengi. „Svo langaði mig líka að sýna samstarfsfólki mínu hvað það er sem við erum að fást við.“
Út á hvað gengur vinnan? „Í sjóferðunum í kringum landið förum við í 36 vita sem allir nema einn eru sólarorkuvitar. Við mælum ástand á rafgeymum og tökum ákvörðun út frá því hvað gert verður á næsta ári. Við skiptum um þær perur sem eru farnar og prófum allan búnað og athugum hann. Ef farið er að sjá á honum skrifum við það hjá okkur og skiptum um í næstu ferð.“
Í sumar verður til dæmis skipt um rafgeyma á tveimur stöðum og er það mikil erfiðisvinna. „Það þarf að skipta um 15 rafgeyma á hvorum stað og hver rafgeymir er 23 kíló. Þeir sem fluttir eru í burtu eru ekkert léttari,“ segir Guðmundur en sjóferðirnar eru yfirleitt mikið púl. „Við vinnum þá frá morgni til kvölds og erum alveg búnir á því. Eiginlega þyrfti maður frí á launum í tvo daga til að jafna sig,“ segir hann glettinn.
Veðrið á Íslandi er ekki alltaf árennilegt. Eru þessar ferðir stundum hættuspil? „Nei, við erum mjög meðvitaðir um að fara ekki út í tvísýnu og það voru nokkrir vitar sem við slepptum í sjóferðinni í fyrra þar sem aðstæður voru of erfiðar.“
Erfiðustu vitarnir sem þarf að sinna eru á Geirfuglaskeri og Þrídröngum en þangað þurfa viðgerðarmennirnir að síga úr þyrlu. Guðmundur segir það ekki mikið mál. Maður finnur það strax þegar maður er í kringum þessa menn hjá Landhelgisgæslunni að maður er í öruggum höndum.“
Myndband Guðmundar má sjá hér.