Fréttir
Stefnir í meiri umferð á höfuðborgarsvæðinu en metárið 2008
gangi spár eftir verður umferðin 2014 meiri en 2008
Ef ekki eitthvað mikið gerist má reikna með því að umferðin árið 2014 á höfuðborgarsvæðinu verði meiri en hún var metárið 2008. Umferðin á Hringveginum verður þó ekki jafnmikil í ár og hún var metárið þar, sem var árið 2007. Það sem af er ári hefur umferðin á höfuðborgarsvæðinu aukist um 3,3 prósent sem er mesta aukning síðan árið 2007.
Umferðin innan höfuðborgarsvæðisins jókst um 3,5% milli októbermánaða 2013 og 2014. Þetta er, hlutfallslega nánast, sama aukning og varð á Hringvegi á milli sömu mánaða. Áætlað er að umferð hafi aukist mest um mælisnið á Reykjanesbraut við Dalveg í Kópavogi eða um 5,7% en minnst um mælisnið á Hafnarfjarðarvegi sunnan Kópavogslækjar eða um 1,7%.
Þróun, það sem af er ári, milli áranna 2013 og 2014
Þróun, það sem af er ári, milli áranna 2013 og 2014
Það sem af er ári hefur umferð innan höfuðborgarsvæðis aukist um 3,3%, sem er mesta aukning miðað við árstíma síðan árið 2007.
Horfur út árið 2014
Horfur út árið 2014
Nú, þegar aðeins tveir mánuðir eru eftir af árinu 2014, eru allar líkur á að umferðin á höfuðborgarsvæðinu aukist um 3,4% á árinu 2014 miðað við árið á undan. Gangi þessi spá eftir er þetta mesta aukning síðan árið 2007 og þá yrði um nýtt met í umferðinni að ræða, sem jafngildir 1,5% meiri umferð en met árið 2008. Líkt og á Hringvegi er birt vísitölurit, er sýnir þróun umferðar frá árinu 2005. Hafi einhver velkst í vafa um fylgni milli umferðar og hagvaxtar má benda á meðfylgjandi vísitölurit umferðar og hagvaxtar þar sem glöggt má sjá hversu gríðarleg fylgni er þarna á milli.