Fréttir
Nýtt vegrið bjargaði þremur
rétt utan við eyðibýlið Laugar í Súgandafirði á Vestfjörðum
Glænýtt vegrið bjargaði því að ökumaður sem missti stjórn á bíl sínum færi útaf og niður bratta hlíð á þriðjudaginn var. Vegriðið var nánast fullfrágengið en virkaði eins og ætlast er til.
Það var um kvöldmatarleytið þann 22. október að ökumaður missti stjórn á fólksbíl sínum í hálku á Súgandafjarðarvegi (65) á Vestfjörðum og lenti á glænýju víravegriði. Á þeim tíma var Rekverk ehf. að ljúka við uppsetningu á víravegriðinu, sem er alls 2,4 km langt. Vegriðið var nánast fullbúið og virkaði eins og til er ætlast. Þarna er hátt og bratt framaf niður í fjöru og mjög líklegt að vegriðið hafi bjargað því að bifreiðin, sem í voru tveir ungir menn auk ökumanns, færi útaf.
Þetta átti sér stað rétt utan við eyðibýlið Laugar í Súgandafirði. Þarna fór því betur en á horfðist. Það er mikilvægt að ökumenn haldi árvekni sinni sérstaklega núna þegar vetrarveður og vetrarfærð eru að ganga í garð. Það tekur alltaf tíma að stilla sig af frá sumarakstri yfir í vetrarakstur og því gott að vera meðvitaður um að aðstæður eru að breytast og þær geta breyst hratt.