Hraðatakmarkanir við þjóðgarðinn á Þingvöllum
þéttbýlishlið sett upp við þjóðgarðinn
Þéttbýlishlið sem svo eru kölluð hafa verið sett upp við tvo innganga í þjóðgarðinn á Þingvöllum. Tilgangurinn er að ná niður hraðanum áður en komið er inn í þjóðgarðinn en þar er hámarkshraðinn mun minni en almennt á þjóðvegum eða 50 km/klst.
Spurningar hafa vaknað um þessa framkvæmd vegna þess að þau mistök áttu sér stað að eyja var sett upp áður en yfirborðsmerkingar voru komnar á veginn. Að minnsta kosti hefði þetta þurft að gerast samtímis. Yfirborðsmerkingar voru að mestu málaðar fyrir nokkru síðan en lokið verður við þær í dag með því m.a. að hylja heila kantlínu. Svæðið verður merkt sérstaklega þar til framkvæmdum er að fullu lokið.
Þéttbýlishlið er að finna víða á landinu, þar á meðal í nágrenni þjóðgarðins til dæmis við Laugarvatn og Reykholt. Þau eru sett upp þar sem þjóðvegur liggur um þéttbýli og er það gert í umferðaröryggisskyni, það er að segja til þess að ná hraðanum niður. Sú er líka ástæðan með þjóðgarðinn, þar sem innan hans er 50 km/klst hámarkshraði. Þannig er hraði lækkaður úr 90 km/klst í 70 km/klst nokkru áður en komið er að þéttbýlishliði og við hliðið er hraðinn síðan lækkaður í 50 km/klst.
Hliðin auðvelda vegfarendum að átta sig á því að hámarkshraðinn er að breytast og nauðsynlegt er að hægja ferðina. Þess vegna er sveigjan framhjá eyjunni á leið inn á svæði með lægri hámarkshraða en akbrautin bein þegar menn geta aukið hraðann út úr þéttbýlinu, eða þjóðgarðinum í þessu tilviki.
Rétt er líka að benda á að mynd - sem gengið hefur á netinu og má finna á Facebook síðu Vegagerðarinnar - sjást ekki hliðin sem greinilega gefa til kynna að heimilaður hraði lækkar í 50 km/klst auk þess sem áður hefur komið skilti um 70 km/klst hámarkshraða.
