Fréttir
20-30 tonna grjót féll á veginn á Skarðsströnd
Féll í nótt á Fagradalshlíð - þarf að sprengja grjótið
Eitt grjótið sem féll á veginn við Fagradalshlíð á Skarðsströnd í nótt var gríðarstórt og olli töluverðum skemmdum á veginu. Vegagerðamenn hafa reiknað út að bjargið sé 20-30 tonn að þyngd. Vegurinn lokaðist en var opnaður fyrir klukkan níu í morgun. Bjargið er þó enn í vegkantinum.
Ekki er hægt að koma stórum tækjum til að koma grjótinu burt þar sem þungatakmarkanir eru í gildi og því verður að bregða á það ráð að sprengja bjargið. Það verður gert um kl 16:00 í dag og verður veginum lokað á meðan. Vegfarendur eru beðnir um að fara varlega. Á myndunum sem fylgja fréttinni má sjá hversu miklir kraftar geta verið í gangi í íslenskri náttúru.
