Búið að opna fyrir umferð yfir brúna á Múlakvísl
Vegagerðarmenn gengu fyrstir yfir
(Frétt kl. 12:45) Brúarvinnuflokkar, verktakar sem komið hafa að verkinu, björgunarsveitarmenn og aðrir í ferjuflutningum gengu fylktu liði yfir hina nýju brú yfir Múlakvísl rétt yfir tólf í dag laugardag. Einungis einni vikur frá því að hlaup hreif brúna frá 1990 með sér og einungis einni viku eftir að brúarsérftæðingar Vegagerðarinnar ákváðu með hvaða hætti yrði framkvæmt, og hvernig brúin yrði, hvar hún yrði o.s.frv. Það fór að nokkru eftir því efni sem til var í fórum Vegagerðarinnar.
Niðurstaðan er 156 metra löng stálbitabrú, reist á tréstaurum og með trégólfi. Fyrsti bíll yfir brúna var bíll innanríkisráðherra Ögmundar Jónassonar en með honum í för var ferðamálaráðherrann Össur Skarphéðinsson og vegamálastjóri Hreinn Haraldsson.
En dagurinn í dag er dagur brúarsmiðanna og annarra sem að vinnunni komu, sem allir sem einn hafa lagt á sig gríðarlega vinnu til að þetta mætti takast á mettíma. Það byggir svo allt á reynslu og þekkingu Vegagerðamanna á brúarsmíði og samskiptum við jökulfljótin.
