Umferðin um Hvítasunnuhelgina
Minni en um síðustu Hvítasunnuhelgi en meiri en um síðustu helgi
Umferðin um helgina síðustu var töluvert meiri en um sömu helgi í júní árið 2010, en hinsvegar var hún minni en um Hvítasunnuhelgina fyrir ári síðan þótt helgin sú væri fyrr á árinu eða 22. - 24. maí.
Erfitt er að bera saman umferðina á þennan hátt milli ára enda helgarnar mjög misjafnar og ber að hafa á þann fyrirvara. Umferðin á föstudegi, laugardegi og sunnudegi er borin saman. Til að auka á óvissuna var teljari á Hellisheiði bilaður um helgina.
Þá lítur samanburðurinn svona út, þegar búið er að taka Hellisheiðina út úr myndinni:
Athugið! Hér er verið að bera saman Hvítasunnuhelgi í júní 2011 við venjulega helgi í júní 2010, því er ekkert óvenjulegt við það að umferðin sé meiri nú í ár.
Umferð um Ingólfsfjall jókst um 7,8%
Umferð um Geitháls jókst um 1,5%
Umferð um Árvelli jókst um 4,4%
Umferð um Hvalfjarðargögn jókst um 3,5%
Umferð um Hafnarmela jókst um 5,1%
Einnig má búast við meiri umferð um næstu helgi, borin saman við sömu helgi 2010, þar sem 17. júní ber upp á föstudag nú í ár.
Til frekari upplýsinga ákvað Vegagerðin að bera saman Hvítasunnuhelgina í ár (10.-13. júní) við Hvítasunnuhelgina árið 2010 (21.-24. maí), til að sjá til samanburðar hvernig þær koma út þótt þær séu í sitt hvorum mánuðinum, þá kann það að gefa vísbendingar um raun stöðuna:
Samanburðarstaðir eru Ingólfsfjall og Hvalfjarðargöng, föstudagur til og með mánudags:
Staður 2010 2011
Ingólfsfjall 44.673 (bílar) 43.518 (bílar) -2,6% samdráttur
Hvalfjarðargöng 31.937 (bílar) 30.828 (bílar) -3,5% samdráttur
Athygli vekur að um samdrátt sé að ræða þótt Hvítasunnuhelgin í ár sé 3 vikum seinna í árinu.