Töluvert fleiri óku til Dalvíkur um Fiskidagshelgina í ár en í fyrra
4 þúsund fleiri bílar um þessa Fiskidagshelgi
Í fyrsta sinn, frá því að Vegagerðin hóf að flytja reglulega fréttir af helgarumferð á Hringvegi við Höfuðborgarsvæðið, mælist minni umferð á öllum 5 talningastöðunum m.v. sama tíma árið 2008. Minni umferð var alla dagana þ.e. föstudag, laugardag og sunnudag. Er umferð þessa helgina sú minnsta sem mælst hefur yfir helgi, á tímabilinu.
Meðalumferðin yfir tímabilið lækkar því, en enn er verslunarmannahelgin (án mánudagsins) í ár undir því meðaltali. Meira dró úr umferð austan Höfuðborgarsvæðis en norðan. Mest dró úr umferð um Sandskeið eða tæp 11%, en minnst um Hvalfjarðargöng eða tæp 5%.
Sjá samanburð á helgum sumarins og tölurnar um nýliðna helgi.
Breytingarnar voru eftirfarandi:
Undir Ingólfsfjalli -8,5%
Um Hellisheiði -8,7%
Um Sandskeið -10,7%
Árvellir á Kjalarnesi -7,3%
Um Hvalfjarðargöng -4,9%
Fiskidagurinn mikli
Að þessu sinni var ákveðið að láta umferðartölur, fyrir Hámundastaðaháls, fylgja með vegna Fiskidagsins mikla á Dalvík.
Hámundarstaðaháls er staðsettur rétt austan Dalvíkur, í átt að Akureyri. Af þessum talningastað má lesa að umferð sömu helgi 2009 er talsvert meiri, alla dagana, en á sama tíma 2008 eða samtals tæpum 25%.
Það fóru rúmlega 19 þúsund bílar um hálsinn yfir tímabilið borið saman við rúmlega 15 þúsund bíla árið 2008.