Breytingar á akstri almenningsvagna á landsbyggðinni um áramót
Fjögur svæði boðin út síðastliðið vor
Þann 1. janúar verða nokkrar breytingar á skipulagi almenningsvagna í framhaldi af útboði Vegagerðarinnar í vor. Nýir aðilar taka við akstri flestra leiða nema á Austurlandi og Vestfjörðum. Vegagerðin annast skipulag almenningssamgangna á landsbyggðinni. Hún sér þannig um skipulag á akstri almenningsvagna á milli sveitarfélaga og þéttbýlissvæða, á rekstri ferja og að haldið sé úti flugi á ákveðna staði.
Akstur almenningsvagna á landsbyggðinni hefur á undanförnum árum verið á herðum margra verktaka en rekstur hefur miðast við hverja akstursleið fyrir sig. Til að einfalda rekstur og fá betri yfirsýn yfir hvert landsvæði var ákveðið að bjóða út akstur á landsbyggðinni með nýjum hætti síðastliðið vor.
Ríkiskaup fór með umsjón útboðsins fyrir hönd Vegagerðarinnar. Útboðið var í fjórum hlutum: Vestur- og Norðurland, Norður- og Norðausturland, Suðurland og Suðurnes. Hægt var að senda inn tilboð í einstaka hluta útboðsins eða alla fjóra.
Niðurstaðan var að taka tilboði Hópbíla um Vestur- og Norðurland, Suðurland og Suðurnes, og tilboði SBA um Norður- og Norðausturland.
Austurbrú, samtök sveitarfélaga á Austurlandi, sem hingað til hefur haft umsjón með akstri almenningsvagna á Austurlandi heldur því áfram. Þá voru Vestfirðir ekki inn í útboðinu, þar er enn samið við verktaka um einstakar akstursleiðir en þó er ætlunin að gera Vestfirði að sér útboðssvæði síðar meir.
Akstur á vegum Hópbíla og SBA hefst 1. janúar 2021 en þjónustutíminn er til 31. desember 2023.
Allar nánari upplýsingar er að finna á heimasíðu Strætó bs., www.straeto.is en Vegagerðin er með þjónustusamning við Strætó sem leggur til merkingar Strætó bs á vagna og stoppistöðvar og sinnir allri akstursáætlun í samstarfi við Vegagerðina, auk reksturs á þjónustuveri og upplýsingagjöf til notenda.
Vegagerðin vill koma á framfæri kærum þökkum til þeirra sem þjónustað hafa akstur á landsbyggðinni síðustu ár.
Þetta eru þær akstursleiðir sem eru í boði á landsbyggðinni
Vestur- og Norðurland Hópbílar ( nánari upplýsingar á straeto.is )
57 Akureyri » Sauðárkrókur » Blönduós » Borgarnes » Akranes » Reykjavík
58 Stykkishólmur » Borgarnes
59 Borgarnes » Búðardalur » Hólmavík
82 Hellissandur » Grundarfjörður » Stykkishólmur
84 Skagaströnd » Blönduós
Norður- og Norðausturland SBA ( nánari upplýsingar á straeto.is )
56 Akureyri » Reykjahlíð » Egilsstaðir
78 Siglufjörður » Ólafsfjörður » Dalvík » Akureyri
79 Húsavík » Akureyri
Suðurnes Hópbílar ( nánari upplýsingar á straeto.is )
55 KEF Airport » Reykjanesbær » Keilir » Fjörður » Reykjavík/HÍ
87 Vogar » Vogaafleggjari
88 Grindavík » Grindavíkurafleggjari » Reykjanesbær
89 Reykjanesbær » Garður » Sandgerði
Suðurland Hópbílar ( nánari upplýsingar á straeto.is )
51 Höfn » Skaftafell » Vík »Hvolsvöllur » Selfoss » Hveragerði » Reykjavík
52 Reykjavík » Hveragerði » Selfoss » Hella » Hvolsvöllur » Landeyjahöfn
71 Þorlákshöfn » Hveragerði
72 Selfoss » Borg » Reykholt » Flúðir » Selfoss
73 Selfoss » Flúðir » Reykholt » Laugarvatn » Grímsnes » Selfoss
75 Selfoss » Stokkseyri » Eyrarbakki » Selfoss
Austurland Austurbrú ( nánari upplýsingar á straeto.is )
E1 Egilsstaðir » Reyðarfjörður » Eskifjörður » Norðfjörður (Neskaupsstaður)
E3 Seyðisfjörður » Egilsstaðir
E2 Reyðarfjörður » Fáskrúðsfjörður » Stöðvarfjörður » Breiðdalsvík
E4 Djúpivogur » Höfn
E5 Borgarfjörður » Egilsstaðir
Vestfirðir
Upplýsingar um almenningssamgöngur milli Bolungarvíkur og Ísafjarðarbæjar.
Upplýsingar um almenningssamgöngur á Patreksfirði,Tálknafirði og Bíldudal.
