Samkomutakmarkanir og minni umferð
merkja má í síðustu viku áhrif sóttvarnaraðgerða
Umferð á höfuðborgarsvæðinu í síðustu viku var 21 prósenti minni en í sömu viku fyrir ári síðan og 15 prósentum minni en í vikunni þar á undan. Líklegt má telja að auknar samkomutakmarkanir og hvatning sóttvarnaryfirvalda til fólks um að vera sem minnst á ferð að óþörfu skili sér í þessum samdrætti í umferð.
Í fyrstu bylgju faraldursins birti Vegagerðin umferðartölur vikulega frá höfuðborgarsvæðinu til að meta áhrif kórónaveirunnar á umferðina og tekur það nú upp aftur í þessari bylgju farsóttarinnar.Nýliðin vika, eða vika 41, er fyrsta heila vikan með auknum samkomutakmörkunum vegna Covid-19 faraldursins, reyndist umferðin í þremur lykilmælisniðum á höfuðborgarsvæðinu tæplega 21% minni en hún var í sömu viku á síðasta ári. En í vikunni á undan, eða viku 40, varð hins vegar tæplega 8% samdráttur frá árinu á undar. Í viku 41 í ár mældist umferðin hinsvegar 15% minni en í viku 40 nú í ár. Þannig að samdráttur milli vikna er töluverður.
Mest dróst umferðin saman í sniði á Hafnarfjarðarvegi eða um tæp 30% en minnst í sniði á Reykjanesbraut eða um tæp 17%.
Eins og sést á línuritinu sem fylgir, sem sýnir hlutfallslegan mun á milli vikna, hefur verið samdráttur í öllum vikum síðan í viku 24 og umferð hefur dregist saman í langflestum vikum ársins, það er aðeins í vikum 4-6, 8 og 24 sem umferðin hefur aukist í ár.
