Fréttir
  • Hjarta úr hjálmum.
  • Yfir hundrað hjól og um 200 manns voru á samstöðufundinum.
  • Port Vegagerðarinnar var opnað til að skapa pláss fyrir bifhjólafólk.
  • Jokka G. Birnudóttir las upp yfirlýsingu fyrir hönd bifhjólafólks.
  • Einnar mínútu þögn í minningu fallinna félaga. Bergþóra Þorkelsdóttir forstjóri Vegagerðarinnar með forsvarsmönnum Sniglanna.
  • Hjálmum var raðað í hjartalaga form til að minnast fallinna félaga.
  • Til minningar um látna félaga.
  • Hópur bifhjólafólks hittist einnig á Akureyri. Þar var lesin upp sama yfirlýsing og við Vegagerðina.

Samstöðufundur bifhjólafólks við Vegagerðina

Yfir hundrað hjól í portinu.

30.6.2020

Samstöðufundur Sniglanna, bifhjólasamtaka lýðveldisins, fór fram við húsnæði Vegagerðarinnar í Borgartúni í dag. Yfir 200 manns sýndu samstöðu og minntust fórnarlamba banaslyss sem varð á Kjalarnesi síðastliðinn sunnudag. Hópur mótorhjólafólks hittist einnig á Akureyri.

Yfir hundrað mótorhjólum var lagt í port Vegagerðarinnar í dag í tilefni af samstöðufundinum. Fjöldi annars fólks kom út til að sýna mótorhjólafólkinu samstöðu, þar á meðal starfsmenn Vegagerðarinnar.

Bifhjólafólk lagði niður hjálma sína til minningar um fallna félaga.

Jokka G. Birnudóttir, gjaldkeri Sniglanna, las upp yfirlýsingu fyrir hönd bifhjólafólks þar sem krafist var úrbóta á þeim vegarköflum sem skapað hafa hættu víðs vegar um landið.

Þar sagði meðal annars: „Við krefjumst breytinga, við krefjumst að öryggi fólks á vegum úti verði í forgangi, ekki bara okkar mótorhjólamanna heldur allra sem ferðast um.“

Að lokum var einnar mínútu þögn í minningu fallinna félaga.