Gríðarleg aukning á umferð á Hringveginum í febrúar
Umferðin heldur áfram að aukast mikið
Milli mánaða áranna 2015 og 2016
Gríðarlega mikil aukning var í umferðinni, um 16 lykilteljara á Hringveginum, á milli febrúarmánaða 2015 og 2016, umferðin jókstu um 16,5%. Umferðin hefur aldrei aukist jafn mikið á milli febrúarmánaða eða verið jafn mikil frá upphafi mælinga, í febrúarmánuði - sjá súlurit. Mest jókst umferðin um Austurland eða um 24,2% en minnst um Vesturland eða um 13,9%. Ástæða þessarar miklu aukningar nú er að hluta til sú að umferðin í febrúar 2015 var í minna lagi.
Frá áramótum milli áranna 2015 og 2016
Umferðin hefur nú aukist um 14,8% frá áramótum. Þessi staða er einnig nýtt met miðað við árstíma. Umferðin hefur aukist mest um Austurland eða um 25,1% en minnst um höfuðborgarsvæðið eða um 13,9%. Þótt umferð aukist minnst í og við höfuðborgarsvæðið þætti tæplega 14% aukning á því svæði gríðarleg aukning.
Umferð eftir vikudögum
Umferðin hefur aukist alla vikudaga en lang mest hefur aukningin orðið á sunnudögum eða heil 40,2%. Ástæða þessarar miklu aukningar nú á sunnudögum er sú að mikill samdráttur var í umferðinni um þetta leyti á síðasta ári miðað við árið á undan. Minnst hefur aukningin orðið á föstudögum eða 5,5%. Frá áramótum er mest er ekið á föstudögum en minnst á þriðjudögum.
Horfur út árið 2016
Of snemmt er að gefa út spá um horfurnar á Hringvegi en óneitanlega eykur þessi byrjun á árinu líkur til þess að umferðin muni aukast talsvert mikið nú í ár.
