Tugmilljóna tjón á vegakerfinu
austfirskir vegir fóru illa í óveðrinu
Tugmilljóna króna tjón varð á vegum á Austurlandi í óveðrinu sem gekk yfir fyrir áramótin, 28. og 30. desember sl. Skemmdir urðu mjög víða, mest vatnsskemmdir og af völdum ágangs sjávar. Starfsmenn Vegagerðarinnar ásamt verktökum fóru strax af stað til að tryggja verstu staðina og vinna að lagfæringum. Frekari skemmdir gætu átt eftir að koma í ljós þannig að ekki er vitað um umfang skemmdanna að fullu.
Sjá má nokkra illa farna staði á myndunum sem fylgja en miklar skemmdir urðu á t.d. Helgustaðavegi þar sem braut víða úr vegi. Vattarnesvegur fór í sundur á þremur stöðum og vegurinn við Andapollinn á Reyðarfirði fór einnig nánast í sundur. Rof var víða við brýr svo sem á Eskifjarðará og á Hrútá í Reyðarfirði. Dalsá í Fáskrúðsfirði tók rofvörn með veginum og gróf veg inn að slitlagi. Þá féll aurskriða yfir Norðfjarðarveg í Grænafelli á Reyðarfirði. Á þó nokkrum stöðum náði vatn að flæða undir klæðingu með tilheyrandi skemmdum og mjög víða skörð í vegi. Svo dæmi séu tekin.
Skemmdir urðu mjög víða mest vegna vatnaskemmda þann 28. desember og vegna ágangs sjávar þann 30. desember.
Umtalsverðar skemmdir urðu á Seyðisfjarðarvegi beggja megin í Fjarðarheiði, Hringvegi í Skriðdal, Skriðdalsvegi, Jökuldalsvegi í Hrafnkelsdal, Borgarfjarðarvegi um Vatnsskarð eystra og Fljótsdalsvegi auk skemmda víða á heimreiðum á þessu svæði.
Þá urðu einnig umtalsverðar skemmdir á Norðfjarðarvegi um Fagradal, við Eskifjörð, um Oddsskarð og á Norðfirði, á Mjóafjarðarvegi, Helgustaðarvegi og Vattarnesvegi, Suðurfjarðavegi innan við Fáskrúðsfjörð, á Hringvegi um Breiðdalsheiði, í Breiðdal og við Breiðdalsvík, Norðurdalsvegi í Breiðdal, Hringvegi á köflum í Berufirði, Álftafirði og við Hvalnes og Hornafjörð. Auk þess urðu skemmdir á heimreiðum víða á umræddum svæðum. Þá urðu einnig skemmdir á Axarvegi í Berufirði og á Hringvegi við Hornafjörð.
Það er ljóst að ekki verða allar skemmdir ljósar fyrr en snjóa leysir með vorinu s.s. á Mjóafjarðarvegi, Axarvegi og víðar á svæðinu.
