Fréttir
  • Holur í vegi

Aukin hætta á að holur myndist í þessu tíðarfari

Nú er veðurfarið þannig að aukin hætta er á holumyndun

23.3.2020

Það er ekki bara Covid-19 heldur er nú líka sá árstími og það tíðarfar sem eykur hættuna á holumyndunum á þjóðvegum. Þegar þíða kemur í kjölfar frosts og kulda eða þegar miklir umhleypingar eru eykst hættan á því að holur myndist í bundnu slitlagi, malbiki og klæðingu. Vegfarendur er því beðnir að sýna sérstaka árvekni og aka ætíð eftir aðstæðum.

Það getur tekið skamman tíma fyrir holu að myndast, jafnvel djúpa holu sem getur leitt til tjóns. Starfsmenn þjónustustöðvanna fylgjast með eins og kostur er og bregðast við ábendingum um holur. Vegagerðin leitast við að bregðast við með viðgerð sem allra fyrst.

Vegagerðin tekur við ábendingum vegfarenda um holur og best er að hringja í síma 1777 meðan þar er opið frá kl. 06:30 á morgnana til 22:00 á kvöldin alla daga á tímabilinu 1. október til 1. maí en einnig má senda upplýsingar á netfangið vegagerdin@vegagerdin.is.

Lendi vegfarandi í tjóni er rétt að fylla út tjónstilkynningu en hana má finna á vef Vegagerðarinnar . Það er mikilvægt að sýna árvekni og vera vakandi fyrir því í umferðinni að holur geta myndast mjög hratt, þannig að þótt ekið sé á vegi sem var í góðu lagi í gær, getur verið komin hola í morgunsárið.