Fjölmenni viðstatt opnun Norðfjarðarganga
mikil hátíð við opnun ganganna
Austfirðingar fjölmenntu að gangamunna Norðfjarðarganga Eskifjarðarmeginn laugardaginn 11. nóvember þegar göngin voru opnuð og formlega tekin í notkun. Það var Jón Gunnarsson samgönguráðherra sem opnaði göngin með því að klippa á borða með aðstoð vegamálastjóra Hreins Haraldssonar.
Honum til halds og trausts voru tveir aldnir Austfirðingar þau Anna Hallgrímsdóttir sem er 100 ára og Stefán Þorleifsson sem er 101 árs gamall. Hann fékk síðan það hlutverk að aka ráðherra og vegamálastjóra fyrstum í gegnum göngin eftir opnunina.
Sá mikli fjöldi sem sótti þennan viðburð, sem sjá má á myndunum, sýnir hversu mikla þýðingu samgöngubót sem þessi hefur fyrir íbúana á svæðinu. Það að þurfa ekki lengur að fara um erfiðan fjallveg til þess að komast upp í 610 m hæð y.s. til að fara í gegnum Oddsskarðsgöngin mun breyta samgöngum algerlega á Austurlandi.
Það var Hreinn Haraldsson vegamálastjóri sem bauð fólk velkomið og sagði m.a. að hann vildi "óska þess að þessi nýju mannvirki stuðli að greiðri og öruggri umferð og verði íbúum svæðisins og vegfarendum öllum til heilla um ókomin ár." Hann flutti einnig kveðju að sunnan: "Ég hef sérstaklega verið beðinn um að flytja kveðju frá Guðna Th. Jóhannessyni forseta Íslands, sem hefði gjarnan viljað vera með okkur í dag. Hann óskar heimamönnum og öðrum vegfarendum til hamingju með þessa miklu samgöngubót, og sendir sínar bestu kveðjur til allra þeirra sem hafa lagt hönd að verki." sagði vegamálastjóri.
Kór Reyðarfjarðarkirkju söng við athöfnina, bæjarstjórinn Páll Björgvin Guðmundsson ávarpaði fólið og þeir séra Davíð Baldursson í Eskifjarðarprestakalli og séra Sigurður Rúnar Ragnarsson í Norðfjarðarprestakalli fluttu blessunarorð. Að því loknu klippti samgönguráðherra á borðann með til þess gerðum skærum, árituðum, sem munu síðan verða römmuð inn með myndum af atburðinum líkt og hefð er orðin fyrir hjá Vegagerðinni við allar stærri framkvæmdir.
Jón Gunnarsson samgöngu- og sveitarstjórnarráðherra óskaði heimamönnum og Austfirðingum til hamingju með daginn og sagði Norðfjarðargöng byltingu í samgöngumálum á Austurlandi. Tilkoma þeirra hefði víðtæk áhrif á öllum sviðum samskipta og atvinnulífs. Þau leystu af hin gömlu Oddsskarðsgöng sem væru barn síns tíma og löngu tímabært að bæta úr. Hann sagði göngin munu efla atvinnulíf á Austurlandi hvort heldur litið væri til fiskvinnslu, fiskeldis, ferðaþjónustu og ekki síður í heilbrigðisþjónustu og skólasókn. Sjá frétt á heimasíðu ráðuneytisins .
Hreinn fór yfir forsöguna í stuttu máli: "Göngin um Oddsskarð voru grafin á árunum 1972-1977. Þau eru 640 m löng, mannvirki gamla tímans og 40 ára gömul, einbreið með 2 útskotum til mætinga og með blindhæð. Göngin liggja í meira en 600 metra hæð yfir sjó og þar er því erfið vetrarfærð.
Athuganir á möguleikum á nýjum jarðgöngum í stað Oddsskarðsganga hafa staðið yfir í langan tíma. Í fyrstu skýrslu sem unnin var til að undirbúa langtímaáætlun um jarðgöng á vegakerfinu og kom út árið 1987 eða fyrir 30 árum var eitt af brýnustu verkefnunum talið vera ný göng milli Eskifjarðar og Norðfjarðar. Eina verkefnið sem eftir er af þeim forgangslista sem þá var settur fram eru göng undir Fjarðarheiði.
Alþingi ákvað með samþykkt samgönguáætlunar vorið 2012 að framkvæmdir við Norðfjarðargöng skyldu hefjast haustið 2013 og ljúka árið 2017."
Og varð það reyndin að fjögur ár tók að grafa gögnin og vinna alla þá vinnu sem þarf við klæða göngin, leggja strengi, setja upp búnað, byggja neyðarrými, malbika o.s.frv.
Um framkvæmdina sagði Hreinn: "Undirbúningur og hönnun mannvirkja var í höndum Vegagerðarinnar og ýmissa ráðgjafa hennar. Fjöldamörg fyrirtæki og einstaklingar koma að verki eins og þessu frá upphafi undirbúnings til formlegrar opnunar. En nú í verklok vill Vegagerðin flytja þeim öllum sínar bestu þakkir fyrir frábærlega vel unnin störf. Hönnuðum og öðrum sem unnu að undirbúningi, verktökum og undirverktökum, eftirliti, og þeim mörgu starfsmönnum Vegagerðarinnar sem komið hafa að verkinu á einn eða annan hátt, og ég vil leyfa mér að nefna þar sérstaklega þá Svein Sveinsson og Gísla Eiríksson. Þá vil ég þakka góð samskipti við sveitarstjórnir og heimamenn almennt meðan á verkinu hefur staðið, að ógleymdum þingmönnum og ráðherrum sem hafa staðið þétt að baki framkvæmdunum."
Heiðursverðir Vegagerðarinnar voru þau Anna Elín Jóhannsdóttir og Helgi Sigfússon en skæravörður var Smári Leví Williamsson.
Að lokinni opnuninni var síðan kaffisamsæti í Dalahöllinni í Fannardal í Norðfirði.
