Björgunarafrek í Kelduá 1980
Vegagerðarmenn komu félögum sínum til bjargar
Í jólaútgáfu Austurgluggans skrifar Jens Einarsson um mikinn hildarleik þegar þremur mönnum var bjargað á síðustu stundu af þaki traktorsgröfu þegar Kelduá í Fljótsdal breyttist á nokkrum klukkustundum úr lítilli á í beljandi haf sem náði fjalla á milli.
Þann 31. október 1980 fóru þrír Vegagerðarstarfsmenn, þeir Guðni Nikulásson verkstjóri, Eiríkur Elísson flokksstjóri og Magnús Jóhannsson gröfumaður á bíl og traktorsgröfu til að tryggja að flóð í Kelduá ylli ekki tjóni á Múlavegi sem nýbúið var að byggja upp. Flóðið reyndist mun meira en útlit var fyrir í fyrstu. Þremenningarnir lentu í mikilli hættu og þurftu að flýja upp á þak traktorsgröfunnar þar sem þeir bundu sig fasta við vélina en hún var á stöðugri hreyfingu í straumharðri Kelduánni sem var í örum vexti og full af ís og krapa. Þar þurftu þeir að dúsa í þrjá og hálfan tíma þar til björgun barst og með ólíkindum að þeir skyldu ekki allir krókna úr kulda, en vatnið hefur varla verið meira en 1 gráða.
Sagan af björguninni er gríðarspennandi enda hreinasta þrekvirki sem unnið var af þeim Ármanni Magnússyni ýtustjóra og Þórhalli Ólafssyni framkvæmdastjóra Vegagerðarinnar á Austurlandi.
