Vegagerðinni hefur verið falið að endurbyggja Hringveg á kafla í Skriðdal, byggja nýjan veg um Öxi á milli Hringvegar í Skriðdal og Hringvegar í Berufirði og endurbyggja Hringveg um botn Berufjarðar auk þess að færa hann til á kafla og byggja þar nýja brú yfir Berufjarðará og nýjan Hringveg.

Mynd Viktors Arnars Ingólfssonar af Grafningsvegi efri var valinn á forsíðu dagatals ROADEX verkefnisins. Myndir voru sendar frá fjölmörgum löndum og prýða sumar þeirra mánuði dagatalsins rétt eins og íslenska myndin.

Verðlaun voru ekki af verra taginu og tengjast umsjónarmanni verkefnisins sem er Skoti.

Níunda rannsóknaráðstefna Vegagerðarinnar var haldin föstudaginn 5. nóvember og þótti heppnast vel. Flutt voru 21 erindi um rannsóknarverkefni sem styrkt eru af rannsóknasjóði Vegagerðarinnar, hvert öðru áhugaverðara.

Samkvæmt vegalögum skal 1,5 prósent af mörkuðum tekjum til vegamála renna til rannsókna- og þróunarstarfs. Erindin á ráðstefnunni endurspegla hluta þess starfs.

Samgöngu- og sveitarstjórnarráðherra Ögmundur Jónasson, ásamt vegamálastjóra Hreini Haraldssyni, opnaði 6 nóvember, formlega Hófaskarðsleið og Raufarhafnarveg. Mikill fjöldi heimamanna var við áningarstaðinn í Hófaskarði þegar ráðherra og vegamálastjóri opnuðu vegina með borðaklippingu svo sem hefð er fyrir.

Þessi vegaframkvæmd fólst í því að tengja saman Kópasker, Raufarhöfn og Þórshöfn með góðum heilsársvegi með bundnu slitlagi og koma þessum byggðum í betra vegasamband við aðra landshluta.

Dýpkun Landeyjahafnar gengur ágætlega enda eru aðstæður góðar. Komi ekkert óvænt upp, þá verður áætlun föstudagsins 5. nóvember eftirfarandi:

Fyrsta ferð verður frá Vestmanneyjum kl. 07:30 til Þorlákshafnar og frá Þorlákshöfn kl. 11:15. Eftir þá ferð er ætlunin að hefja siglingar í Landeyjahöfn að nýju samkvæmt áætlun fyrir þá höfn og verður fyrsta ferð frá Vestmanneyjum kl. 17:00 og til baka frá Landeyjahöfn kl. 18:30 og síðan önnur um kvöldið eins og áætlun segir til um.

Það verður enginn skortur á áhugaverðum erindum á níundu rannsóknaráðstefnu Vegagerðarinnar sem haldin verður að vanda fyrsta föstudag í nóvember, sem í ár ber upp á 5. dag mánaðarins. Ráðstefnan er haldin á Reykjavík Hilton Nordica.

Fyrirsögnin er tekin úr nokkrum þeirra á þriðja tug erinda sem flutt verða á ráðstefnunni sem er kynning á hluta þeirra rannsóknarverkefna sem unnin eru á vegum þróunarsviðs Vegagerðarinnar.

Umferðin á 16 völdum talningarstöðum á Hringveginum jókst um 3,3 prósent í október miðað við októbermánuð 2009. Það kemur töluvert á óvart að umferðin aukist þetta í október en það gerist allstaðar nema á Hellisheiði og þá Suðurlandi.

Ef til vill kann þetta að skýrast af góðu veðri í október því ef litið er til fyrstu tíu mánaða ársins er ljóst að umferð dregst mikið saman og er um mesta samdrátt að ræða síðan þessar mælingar hófust árið 2005.