1905
Norðurland, 15. mars 1905, 4. árg., 25. tbl., bls. 98:
Sýslufundur Eyfirðinga. 2.-7. mars. (Ágrip)
Landspjöll af sýsluvegi.
Sýslunefndin býðst til að borga Birni bónda Arnþórssyni á Hrísum 10 kr. fyrir landspjöll af sýsluvegi, auk kostnaðar við matsgjörð, með því skilyrði að hún sé laus við allar frekari kröfur af því máli.
Dragferja á Stokkahlöðum.
Samþykkt að greiða ferjubóndanum kr. 34 sem álag og skal hann þá viðhalda ferjunni í góðu standi samkv. reglugjörðinni.
Sýsluvegir.
Veittar voru kr. 60 til þess að fá hæfan mann til þess að gera tillögur um legu og áætlun um umbætur á sýsluveginum í Svarfaðardals- og Arnarneshreppi inn að Hörgárbrú með því skilyrði að hrepparnir leggi, hvor að hálfu, fram fé það er á vantar og að maður sá, er til þessa verði fenginn, semji fullkomið yfirlit og geri uppdrátt af sýsluveginum á þessu svæði og tillögur um legu hans, og að skýrslur hans og tillögur verði lagðar fyrir sýslunefndina.
Vegagerð í Öngulstaðahreppi.
Öngulstaðahreppi veittur 100 kr. styrkur úr sýslusjóði til umbóta á hreppsvegi suður frá Ytri-Tjörnum, með því skilyrði að lagðar verði fram til þessa verks að minnsta kosti 200 kr. af hreppsins hálfu og vegabótinni verði lokið 30. júní þ. á.