UMFERÐARMERKI
 
 Prenta


P. Ljósmerki

Eftirfarandi úrdráttur er úr Reglugerð um umferðarmerki og notkun þeirra 289/1995 sem finna má í reglugerðarsafni Dóms- og kirkjumálaráðuneytisins.

Ljósmerki til að stjórna umferð skulu sýna rautt, rautt og gult, grænt eða gult ljós, sbr. þó ljósmerki P51 fyrir strætisvagna. Ef fleiri en eitt ljósmerki er notað á sama stað skulu ljósker vera í lóðréttri röð með rauðu ljósi efst en grænu neðst.

Rautt ljós merkir að nema skuli staðar. Ökutæki skal stöðvað áður en komið er að stöðvunarlínu eða, ef stöðvunarlínu vantar, umferðarljósastólpa. Gangandi vegfarandi eða hjólreiðamaður má ekki hefja för yfir akbraut. Vegfarendur sem komnir eru inn á svæði þar sem ljósið stjórnar umferð skulu eftir því sem unnt er yfirgefa það; gangandi vegfarendur skulu þó halda að næstu gangstétt, umferðareyju eða vegöxl.

Rautt ljós samtímis gulu ljósi hefur sömu merkingu og rauða ljósið eitt sér, en gefur jafnframt til kynna að brátt skipti yfir í grænt ljós. Vegfaranda er óheimilt að halda áfram för fyrr en græna ljósið er komið.

Grænt ljós merkir að halda megi áfram för, enda brjóti vegfarandi ekki með því bága við önnur ákvæði.

Gult ljós eitt sér merkir að numið skuli staðar. Það gefur til kynna að brátt skipti yfir í rautt ljós, en hefur að öðru leyti sömu merkingu og rautt ljós. Ökumaður skal þó ekki nema staðar ef hann, þegar skipt er úr grænu ljósi í gult, er kominn það langt fram að stöðvun muni hafa í för með sér hættu.

Almenn umferðarljós - P11 Almenn umferðarljós - P11
Ljósmerkið skal vera með hringlaga ljósopi fyrir - rautt, gult og grænt ljós. Röð merkjanna skal vera rautt, - rautt og gult, grænt, gult, rautt. Ljósmerkin gilda fyrir alla umferð, nema umferð sé stjórnað sérstaklega með P21 ljósmerkjunum P21 - P61.
Ljósörvar - P21(a) Ljósörvar - P21(a)
Ljósmerkið getur verið með ljósopi fyrir rauða, gula og græna ör. Ljósörvar eru að jafnaði notaðar í tengslum við almenn umferðarljós, þannig að ljósop fyrir sama lit eru venjulega hlið við hlið. Ljósörvar gilda fyrir þá vegfarendur sem ætla að aka í þá átt sem örin vísar. Hjólreiðamaður sem ætlar að beygja til vinstri og á samkvæmt 3. mgr. 39. gr. umferðarlaga að fara beint áfram yfir vegamótin skal því fara eftir þeim merkjum sem gilda um umferð beint áfram.
Ljósörvar - P21(b) Ljósörvar - P21(b)
Ljósmerkið getur verið með ljósopi fyrir rauða, gula og græna ör. Ljósörvar eru að jafnaði notaðar í tengslum við almenn umferðarljós, þannig að ljósop fyrir sama lit eru venjulega hlið við hlið. Ljósörvar gilda fyrir þá vegfarendur sem ætla að aka í þá átt sem örin vísar. Hjólreiðamaður sem ætlar að beygja til vinstri og á samkvæmt 3. mgr. 39. gr. umferðarlaga að fara beint áfram yfir vegamótin skal því fara eftir þeim merkjum sem gilda um umferð beint áfram.
Umferðarljós fyrir gangandi vegfarendur - P41 Umferðarljós fyrir gangandi vegfarendur - P41
Ljósmerkið skal vera með rauðu ljósopi sem sýnir mann í kyrrstöðu og grænu ljósopi sem sýnir mann á göngu. Grænt ljós sem slokknar og kviknar á víxl gefur til kynna að brátt skipti yfir í rautt ljós. Þar sem fleiri en eitt ljósmerki fyrir gangandi vegfarendur er í þeirri stefnu sem farið er gildir það merki sem næst er.
Umferðarljós fyrir strætisvagna - P51 Umferðarljós fyrir strætisvagna - P51
Ljósmerkið skal vera með hvítu ljósi í öllum þremur ljósopum. Efsta ljósið jafngildir rauðu ljósi á almennum umferðarljósum, ljósið í miðju jafngildir gulu ljósi og neðsta ljósið jafngildir grænu ljósi. Ljósmerki þessi gilda fyrir strætisvagna og áætlunarbifreiðir
Rautt blikkandi ljós - P71 Rautt blikkandi ljós - P71
Ljósmerkið getur verið með einu eða tveimur ljósum sem kvikna og slokkna á víxl. Þeim má koma fyrir þar sem er útakstur ökutækja til neyðaraksturs, flugvélar stefna þvert á veg í lágflugi og annars staðar þar sem nauðsyn ber til að loka vegi vegna sérstakrar hættu. Ljósmerkið gefur til kynna að vegfarendur skuli nema staðar áður en komið er að stöðvunarlínu eða, ef stöðvunarlínu vantar, ljósmerki. Ökumaður skal þó ekki nema staðar ef hann, þegar ljósið kviknar, er kominn það langt fram að stöðvun muni hafa í för með sér hættu.
Gult blikkandi ljós - P72 Gult blikkandi ljós - P72
Ljósmerkið skal sýna eitt eða fleiri gul ljós sem kvikna og slokkna á víxl eða vera hverfiljós. Það merkir að vegfarendur skuli sýna sérstaka varúð. Merkið má setja upp þar sem vegavinna fer fram, við gangbrautir og annars staðar þar sem slíkrar viðvörunar er þörf, sbr. þó ljósmerki P73.
Blátt blikkandi ljós - P73 Blátt blikkandi ljós - P73
Ljósmerkið skal sýna blátt ljós sem kviknar og slokknar á víxl eða vera hverfiljós. Það gefur til kynna að vegfarendur skuli sýna sérstaka varúð vegna slyss eða eldsvoða.