Umferðarþjónusta - Tilkynning - 8.3.2018

Umferðatafir

Umferðatafir verða við brúna yfir Jökulsá á Sólheimasandi frá kl. 11 í dag fimmtudaginn 8. mars og eitthvað fram eftir degi. Verið er að skipta um handrið á brúnni. Umferð verður stöðvuð í 10-15 mín. öðru hverju. Bílar frá Vegagerðinni verða sitt hvoru megin brúar og stjórna umferðinni.

Færð og aðstæður

Vegir eru greiðfærir á Suður- og Suðvesturlandi, og á Vesturlandi eru víðast aðeins hálkublettir eða vegir alveg auðir. Þó er hálka á Svínadal.

Hálka eða hálkublettir er allvíða á Vestfjörðum einkum á norðanverðum fjörðunum og í Djúpinu. Snjóþekja og éljagangur er á Steingrímsfjarðarheiði en þæfingur og skafrenningur á Þröskuldum.

Á Norðurlandi eru vegir að miklu leyti auðir austur í Skagafjörð en þar fyrir austan hefur éljað og er víðast  hálka eða snjóþekja.

Hálka eða snjóþekja er á flestum vegum á Austurlandi en þæfingur og snjókoma er á Fjarðarheiði og á Möðrudalsöræfum,  vegir með suðausturströndinni eru hins vegar mikið til auðir frá Höfn suður um.

Skemmdir á slitlagi

Eftir veðurfarið að undanförnu hefur mikið borið á slitlagsskemmdum á vegum. Á þessum árstíma er aðeins hægt að bregðast við með ófullkomnum bráðabirgðaviðgerðum og því eru vegfarendur beðnir að sýna sérstaka aðgát við þessar aðstæður.